Герцаг Люксембурга Анры ў сваім калядным звароце да нацыі 24 снежня абвясціў, што адракаецца ад трона. Манарх складзе паўнамоцтвы 3 кастрычніка 2025 года, перадаўшы ўладу свайму старэйшаму сыну — прынцу Гіёму, паведамляе выданне People.
У сваёй прамове 69-гадовы Анры, што кіраваў краінай з 2000 года, адзначыў, што азіраецца на амаль 25-гадовы перыяд свайго кіравання «з глыбокай удзячнасцю і пакорай».
«Гэта была чвэрць стагоддзя выклікаў, магчымасцяў і надзей на лепшую будучыню: тэхналагічнага і эканамічнага прагрэсу, сацыяльных зменаў, але таксама і мноства канфліктаў», — сказаў манарх.
Цікава, што бацька цяперашняга кіраўніка, вялікі герцаг Жан, таксама абвясціў пра перадачу ўлады напярэдадні Калядаў 1999 года, пасля 36 гадоў кіравання.
Спадчыннік трона, 43-гадовы прынц Гіём, ужо пачаў падрыхтоўку да будучай ролі. У чэрвені гэтага года абвясцілі пра яго ўступленне на пасаду прадстаўніка бацькі, а ў кастрычніку адбылася афіцыйная цырымонія прызначэння прынца лейтэнант-прадстаўніком вялікага герцага.
У вялікага герцага Анры і яго жонкі Марыі Тэрэзы пяцёра дзяцей: акрамя Гіёма гэта прынцы Фелікс, Луі, Себасцьян і прынцэса Аляксандра.