УСУ ў Курскай вобласці Расіі ўдзень 7 жніўня захапілі газавымяральную станцыю «Суджа», паведамілі адразу некалькі расійскіх праваенных тэлеграм-каналаў. Расійскія ваенныя блогеры пішуць, што вырачаны і горад Суджа. Між тым кіраўнік расійскага Генштаба Валерый Герасімаў далажыў Пуціну, што прасоўванне УСУ ўглыб рэгіёна спыненае. Сабралі ўсё вядомае на гэты момант пра тое, што адбываецца ў Курскай вобласці, дзе другі дзень ідуць баявыя дзеянні, якіх афіцыйны Кіеў ніяк не каментуе.
Мінабароны Расіі: «Аперацыя будзе завершаная разгромам праціўніка»
Кіраўнік расійскага Генштаба Валерый Герасімаў заявіў, што прасоўванне УСУ ўглыб Расіі на Курскім кірунку спыненае.
«Дзеяннямі падраздзяленняў прыкрыцця дзяржаўнай мяжы сумесна з памежнікамі і падраздзяленнямі ўзмацнення, ударамі авіяцыі, ракетных войскаў і агнём артылерыі прасоўванне праціўніка ўглыб тэрыторыі на Курскім кірунку спыненае», — далажыў Герасімаў Пуціну.
Прэзідэнт Расіі сёння сабраў нараду па сітуацыі ў Курскай вобласці. На ёй прысутнічалі міністр абароны РФ Андрэй Белавусаў, кіраўнік ФСБ РФ Аляксандр Бортнікаў і сакратар Савета бяспекі Расіі Сяргей Шайгу. Герасімаў дакладваў праз відэасувязь, са словаў Пуціна, з «аднаго з пунктаў аператыўнага кіравання».
Страты УСУ ў Курскай вобласці кіраўнік расійскага Генштаба ацаніў у 315 чалавек (не менш за 100 забітымі) і 54 адзінкі бранятэхнікі (7 танкаў).
«Аперацыя будзе завершаная разгромам праціўніка і выхадам на дзяржаўную мяжу», — запэўніў ён Пуціна.
Захапілі газавымяральную станцыю «Суджа» і стварылі выступ
Афіцыйны Кіеў пра тое, што адбываецца, па-ранейшаму маўчыць. Між тым, калі верыць інфармацыі расійскіх «ваенкараў», усё насамрэч не так вясёлкава, як дакладваў Герасімаў.
Расійскі праваенны тэлеграм-канал «Рыбарь» напісаў, што байцы УСУ захапілі газавымяральную станцыю «Суджа», якая знаходзіцца недалёка ад аднайменнага пункта пропуску на расійска-ўкраінскай мяжы. Ад станцыі да горада Суджа, які з учорашняй ночы зазнае абстрэлы, — дзевяць кіламетраў.
Праз ГВС «Суджа» «Газпрам» пастаўляе газ у краіны Еўропы і, як адзначаюць «Важные истории», гэта адзіны маршрут.
«Звесткі расійскіх ваенных блогераў і геалакаваныя відэа сведчаць пра тое, што УСУ маглі ў раёне Суджы стварыць выступ глыбінёй да 10 км», — піша «Агентство».
Выданне таксама паведамляе, што спадарожнікі НАСА, якія адсочваюць пажары ва ўсім свеце, зафіксавалі ў сераду агонь у горадзе Суджа Курскай вобласці, а таксама ў размешчаных побач сёлах Свердлікава і Ганчароўка. Напярэдадні пажары былі ў сямі населеных пунктах у раёне горада.
«Нам паступае інфармацыя пра вялікую колькасць ваеннапалонных УС РФ, узятых у палон 6 жніўня. Лік ідзе на некалькі дзясяткаў, больш дакладныя звесткі стануць вядомыя неўзабаве», — паведамляе тэлеграм-канал украінскага дзяржаўнага праекта «Хачу жыць».
«Суджа гарыць»
«У Суджы па-ранейшаму застаецца вялікая колькасць мірных жыхароў. У горадзе назіраюцца шматлікія ўзгаранні і разбураныя будынкі. Абстрэлы з артылерыі. Няспынна працуе СПА. Адсутнічаюць электрычнасць і водазабяспечанне. Жыхары аказваюць дапамогу адно аднаму: хтосьці падвозіць ваду, а хтосьці дапамагае эвакуяваць людзей», — піша тэлеграм-канал «Суджа родная».
Ён таксама публікуе відэа, на якім святар мясцовай царквы расказвае, што ўвесь горад «у хлам», «Суджа гарыць», і кажа, што ў царкве хаваюцца некалькі сем’яў з дзецьмі: «Зараз будзем думаць, чым іх карміць».
Часовы выканаўца абавязкаў губернатара Аляксей Смірноў у сваім тэлеграм-канале паведаміў, што з тэрыторый, якія абстрэльваюцца, арганізавана вывезлі больш за 200 чалавек, на асабістым транспарце з зоны абстрэлаў выехала некалькі тысяч.
Паводле звестак на раніцу 7 жніўня, пацярпелі 28 чалавек. Загінулі пяцёра мірных жыхароў.
Між тым блізкі да Мінабароны Расіі тэлеграм-канал «Рыбарь» і ваенкор Юрый Кацянок паведамілі, што УСУ зайшлі адразу ў два райцэнтры Курскай вобласці — Суджу і Каранёва. Іншыя ваенныя блогеры пішуць, што нават калі Суджа яшчэ не ўзятая, то горад усё роўна асуджаны.
Нагадаем, атака на Курскую вобласць пачалася раніцай 6 жніўня.
Увечары 6 жніўня ў Мінабароны Расіі паведамілі, што каля 08.00 «праціўнік пасля агнявой падрыхтоўкі сіламі да трохсот баевікоў <…> атакаваў пазіцыі падраздзяленняў прыкрыцця дзяржаўнай мяжы Расійскай Федэрацыі ў раёнах населеных пунктаў Мікалаева-Дар'іна і Алешня Курскай вобласці, якія непасрэдна прымыкаюць да расійска-ўкраінскай мяжы».
Пазней у расійскім вайсковым ведамстве адзначылі, што «агнём артылерыі, ударамі армейскай авіяцыі і выкарыстаннем ударных БПЛА праціўніку было нанесенае агнявое паражэнне».
Паводле звестак Z-каналаў, у ноч на 7 жніўня УСУ занялі 11 населеных пунктаў.
З боку Украіны пакуль не было ніякіх пацверджанняў таго, што УСУ вядуць баі ў памежжы Курскай вобласці РФ.