Раніцай у пятніцу, 19 красавіка, Расія атакавала Украіну ракетамі і «Шахедамі». Улады Днепрапятроўскай вобласці паведамляюць пра прылёт у жылую пяціпавярхоўку ў Дняпры. Ёсць загінулыя і пацярпелыя ў горадзе і Днепрапятроўскай вобласці.
«У Дняпры гарыць пяціпавярхоўка. Яна часткова разбураная. Пад заваламі могуць быць людзі», — заявіў кіраўнік Днепрапятроўскай АВА Сяргей Лысак.
Паводле яго, толькі раніцай па рэгіёне выпусцілі дзевяць расійскіх ракет, яшчэ дзве — ноччу. У Дняпры акрамя жылога дома пашкоджаныя два інфраструктурныя аб’екты.
«Усяго ў горадзе цяпер, папярэдне, двое загінулых і 15 параненых», — напісаў Лысак.
Крыху пазней у дзяржслужбе па надзвычайных сітуацыях (ДСНС) Украіны паведамілі, што колькасць пацярпелых павялічылася да 16.
У Крывым Рогу трое пацярпелых.
«У Сінельнікаўскім раёне пашкодзілі больш за дзясятак прыватных дамоў. Пажары аператыўна ліквідавалі ратавальнікі. Загінулі шэсць чалавек, сярод іх дзеці шасці і васьмі гадоў. Два чалавекі былі траўмаваныя», — паведамляе прэс-служба ДСНС.
Пад абстрэл трапіў і Паўлаград, там пашкоджанае адно з прадпрыемстваў.
Улады рэгіёна адзначаюць, што колькасць ахвяр можа вырасці — разборы завалаў працягваюцца.
Прэзідэнт Украіны Уладзімір Зяленскі заклікаў партнёраў перадаць краіне для абароны дастатковую колькасць сродкаў СПА.
«Расія мусіць адказваць за свой тэрор, і кожная ракета, кожны „Шахед“ мусяць збівацца. Свет можа гэта гарантаваць, партнёры маюць неабходныя магчымасці. Гэта было даказана, у прыватнасці, у небе Блізкага Усходу, і гэта мусіць запрацаваць у небе Еўропы», — адзначыў Зяленскі.
Нагадаем, 17 красавіка расійская армія ўдарыла па цэнтры Чарнігава трыма ракетамі «Іскандэр». Адна з іх трапіла ў васьміпавярховы будынак, разбурыўшы некалькі паверхаў. Загінула 18 чалавек, пацярпела 78 чалавек, у тым ліку чатыры дзіцяці.
