Заходні акруговы вайсковы суд асудзіў 26-гадовую Дар’ю Трэпаву на 27 гадоў пазбаўлення волі. Яна прызнаная вінаватай у тэракце ў кавярні ў Санкт-Пецярбургу, у выніку якога быў забіты ваенкар Уладлен Татарскі, перадае ТАСС.
Суд палічыў даказанай віну Трэпавай у тэракце, незаконным абароце выбуховай прылады і ў падробцы дакументаў.
Сама яна прызнала віну толькі ў падробцы дакументаў.
Абвінавачанне прасіла для Трэпавай 28 гадоў калоніі.
Нагадаем, у Санкт-Пецярбургу ўвечары 2 красавіка 2023 года ў выніку выбуху быў забіты ваенны блогер і папулярызатар вайны Максім Фамін, больш вядомы пад псеўданімам Уладлен Татарскі. Замах адбыўся падчас яго творчага вечара, які праходзіў на Васільеўскім востраве ў кавярні Street Food Bar № 1, што належаў структурам заснавальніка ПВК Вагнера Яўгена Прыгожына.
Паводле версіі следства, тэракт «задумала арганізаваная група з Украіны, яна ўцягнула Дар’ю Трэпаву ў яго падрыхтоўку пад выглядам журналісцкай працы». Як сцвярджала абвінавачанне, дзяўчына прывезла бомбу ў Санкт-Пецярбург ва ўпакоўцы пад выглядам статуэткі, яе актывавалі дыстанцыйна з дапамогай тэлефона. Трэпава ў судзе настойвала, што не ведала, што рыхтуецца тэракт, яна думала, што ў статуэтцы праслухоўвальная прылада.