У ХАМАС гатовыя пайсці на «поўны кампраміс» з Ізраілем што да ўгоды па вызваленні ўсіх ізраільскіх закладнікаў, захопленых 7 кастрычніка. Пра гэта ў інтэрв'ю тэлеканалу NBC News заявіў старшы чалец палітбюро ХАМАС Газі Хамад.
Хамад пры гэтым агучыў патрабаванне, якое, як адзначае тэлеканал, ізраільцяне напэўна адхіляць — у руху хочуць, каб Ізраіль вызваліў усіх палестынцаў з ізраільскіх турмаў.
«Мы хочам, каб гэтыя людзі вярнуліся дадому, — сказаў Хамад. — Акрамя таго, мы хочам, каб нашыя зняволеныя зараз жа адправіліся дадому. Таму я думаю, што цяпер мы гатовыя да поўнага кампрамісу, да заключэння пагаднення, каб адпусціць усіх закладнікаў, як вайскоўцаў, так і цывільных асобаў, і да вызвалення ўсіх вязняў з цэнтраў утрымання ў Ізраілі».
Паводле звестак Ізраіля, ХАМАС з 7 кастрычніка ўтрымлівае ў закладніках 242 чалавекі. Чатырох закладнікаў вызвалілі самі чальцы групоўкі, яшчэ аднаго вызвалілі ізраільскія войскі.