Відэа сутыкнення амерыканскага беспілотніка з расійскім Су-27 апублікавала 16 сакавіка Еўрапейскае камандаванне Узброеных сіл ЗША.
У роліку відаць, як Су-27 пралятае побач з дронам, скідваючы паліва. У нейкі момант першы знішчальнік набліжаецца да беспілотніка — і запіс перарываецца. Пасля гэтага ў кадры пачынаюцца памехі, але запіс хутка аднаўляецца і відаць, што ўсе лопасці беспілотніка ў парадку. Пасля другога «збліжэння» Су-27 з БПЛА запіс перарываецца на некалькі секунд. Калі выява аднаўляецца, можна заўважыць, што ў амерыканскага беспілотніка пагнутая адна з лопасцяў.
«Два расійскія самалёты Су-27 здзейснілі небяспечны і непрафесійны перахоп беспілотнага самалёта разведкі, назірання і рэкагнасцыроўкі MQ-9 ВПС ЗША, які знаходзіўся ў міжнароднай паветранай прасторы над Чорным морам. Су-27 скінуў паліва і ўдарыў вінт MQ-9, у выніку чаго сілам ЗША давялося затапіць MQ-9 у міжнародных водах», — гаворыцца ў апісанні да відэа.
Кіраўнік Аб’яднанага камітэта начальнікаў штабоў ЗША Марк Мілі падчас брыфінгу 15 сакавіка адзначыў, што перахоп расійскімі самалётамі дрона дакладна быў наўмысным, як і агрэсіўныя паводзіны расіян, а наконт «фізічнага кантакту» знішчальніка з беспілотнікам ЗША «пакуль не ўпэўненыя».
У Мінабароны Расіі сутыкненне адмаўлялі:
«Раніцай 14 сакавіка ў раёне Крымскага паўвострава зафіксаваны палёт амерыканскага БПЛА ў напрамку дзяржаўнай мяжы [РФ]. Палёт беспілотніка ажыццяўляўся з выключанымі транспондарамі з парушэннем межаў раёна рэжыму выкарыстання паветранай прасторы. Пасля выяўлення <…> у паветра былі паднятыя знішчальнікі са складу СПА сіл. У выніку рэзкага манеўравання [БПЛА ЗША] перайшоў у некіравальны рэжым і сутыкнуўся з воднай паверхняй. Расійскія знішчальнікі бартавое ўзбраенне не ўжывалі, з беспілотным лётным апаратам у кантакт не ўступалі і шчасліва вярнуліся на аэрадром базавання».
