Мінулым летам начальнік Галоўнага ўпраўлення арганізацыі кантрольнай дзейнасці Міністэрства па падатках і зборах Андрэй Сідарчук прысутнічаў на штогадовым выступе Лукашэнкі ў Палацы Рэспублікі. А цяпер ён затрыманы па падазрэнні ў хабарніцтве, піша «Наша Ніва».
Андрэй Сідарчук доўгі час працаваў у структуры Міністэрства па падатках і зборах. Як мінімум з 2019 года ён узначальваў Галоўнае ўпраўленне арганізацыі кантрольнай дзейнасці міністэрства.
У кампетэнцыю яго ўпраўлення ўваходзяць, напрыклад, кантроль за праверкамі падатковай, аналіз метадаў абыходу падатковага заканадаўства, а таксама барацьба з незаконным прадпрымальніцтвам. У 2023 годзе Сідарчук прысутнічаў на штогадовым звароце Лукашэнкі.
Невядома, калі яго арыштавалі, але ён знік пасля лютага 2024 года. Цяпер замест яго кантрольнае ўпраўленне ўзначальвае Таццяна Яўдасьева.
Разам з Сідарчуком судзяць дваіх прадпрымальнікаў — Міхаіла Стэльмаха і Марыну Бабкевіч. Абое — фінансавыя кансультанты: Стэльмах — па пытаннях камерцыйнай дзейнасці і кіравання, а Бабкевіч — па падаткаабкладанні.
Суд пачынаецца 17 студзеня 2025 года. Сярод абвінавачанняў удзельнікам групы ёсць «Атрыманне хабару» (ч.2 і ч. 3 арт. 430 КК), а таксама «Даванне хабару» (ч. 1 і ч. 3 арт. 431 КК).
Хутчэй за ўсё, хабар давалі менавіта Сідарчуку. Яму можа пагражаць да 15 гадоў калоніі, буйны штраф і забарона займаць пэўныя пасады.