У Мінску сілавікі прымусілі хлопца звесці татуіроўку, якая ім не спадабалася, паведамілі праваабаронцы. Заўважылі яны яе пасля таго, як прывезлі мінчука з кепскім самаадчуваннем у бальніцу.
У знятым сілавікамі «пакаяльным» відэа мінчук расказаў, што яму зрабілася кепска на вуліцы па дарозе дадому, і ён звярнуўся да міліцыянтаў па дапамогу. Тыя давезлі яго да бальніцы ў Бараўлянах і прывялі ў прыёмны пакой.
«Падчас усяго яны ўбачылі ў мяне татуіроўкі», — сказаў мінчук і паказаў тату з надпісам ACAB.
Абрэвіятура ACAB значыць «All Cops Are Bastards» («Усе копы — вырадкі»), гэта лозунг, які даўно існуе ў субкультуры скінхэдаў. Шырока выкарыстоўваецца сярод футбольных хуліганаў, у тым ліку як тату.
Як кажа хлопец, супрацоўнікі з ім «правялі гутарку» і «далі ясна зразумець, што яны значаць і наогул што гэта такое». Ён паабяцаў звесці або замаляваць надпіс і вярнуцца з вынікам на вул. Рэвалюцыйная, 3, то-бок у будынак ГУБАЗіК. У другой частцы відэа хлопец паказвае новую татуіроўку на месцы старой і кажа, што «слова стрымаў, супрацоўнікам ўдзячны».
Чытайце таксама
