Камітэт Сейма па нацыянальнай бяспецы і абароне (КНБА) ухваліў прапанову абмежаваць колькасць паездак беларусаў на радзіму, піша Delfi.
«Дазвол на часовае пражыванне ў Літоўскай Рэспубліцы, выдадзены грамадзянам Расійскай Федэрацыі або Рэспублікі Беларусь, анулюецца ў выпадку, калі будзе выяўлена, што яны за апошнія тры каляндарныя месяцы выязджалі ў Расійскую Федэрацыю або Рэспубліку Беларусь часцей за адзін раз і тым самым уяўляюць пагрозу бяспецы Літвы», — прадставіў кампрамісную прапанову падчас паседжання складальнік заключэння, чалец КНБА Ёнас Яруціс.
Экс-міністр нацыянальнай абароны Літвы Арвідас Анушаўскас таксама заявіў пра сваю падтрымку гэтага кампраміснага варыянту. Аднак, паводле яго, гэтая прапанова не вырашыць праблем, якія ўзнікаюць праз грамадзян трэціх краін, што прыбываюць у Літву праз Расію.
Між тым камітэт не падтрымаў ініцыятывы кансерватара Аўдронюса Ажубаліса. Палітык прапаноўваў забіраць у грамадзян Расіі і Беларусі від на жыхарства ў Літве ў тым выпадку, калі яны наведваюць сваю радзіму часцей за раз на квартал за апошнія 12 месяцаў.
