У мінскай мэрыі 10 студзеня прайшло паседжанне каардынацыйнага савета па турызме. На ім абмеркавалі, як завабіць гасцей у сталіцу, а таксама расказалі, хто часцей за ўсё сюды прыязджае, паведамляе «Мінск-Навіны».
Паводле начальніка Галоўнага ўпраўлення спорту і турызму Мінгарвыканкама Максіма Варапая, сярэднестатыстычны мінскі турыст — гэта грамадзянін Расіі (расіяне складаюць 82% ад усіх тых, хто прыязджае) ва ўзросце ад 28 да 52 гадоў (такіх 71% ад усіх турыстаў з Расіі ў Мінску). Часцей за ўсё прыязджаюць жанчыны (58% усіх падарожнікаў), а ўзровень даходу сталічнага турыста — сярэдні (такіх 67%).
Паводле чыноўнікаў, завабліваць гасцей у Мінск варта з дапамогай розных спартовых мерапрыемстваў (Еўрапейскія гульні, Гульні краін СНД), а таксама святкаванняў Дня горада, Дня Перамогі і Дня незалежнасці.
Адно з самых папулярных месцаў для адпачынку ў Мінску ў турыстаў — гэта Верхні горад. Эксперты вывучылі водгукі турыстаў і вырашылі палепшыць гэтае месца. Тут збіраюцца арганізаваць дадатковыя месцы стаянак для турыстычных аўтобусаў, увесці адзіны праязны білет і сістэму адзінай гарадской навігацыі, а таксама будуць развіваць шэраг іншых напрамкаў.