У Беларусі цяпер цыркулююць у асноўным негрыпозныя рэспіраторныя вірусы, паведамілі ў Мінздароўя. Пры гэтым захворвальнасць расце, у тым ліку на каранавірус.
Спецыялісты рэгіструюць вірусы парагрыпу, адэнавірусы, РС-вірусы, рынавірусы, выяўляюцца адзінкавыя выпадкі цыркуляцыі вірусаў грыпу — А (H3N2, H1N1) і В.
«Цяпер захворвальнасць на вострыя рэспіраторныя інфекцыі ў межах сярэдніх дадзеных, з ліку хворых больш за 60% — дзеці да 18 гадоў», — расказалі ў Мінздароўя.
Там адзначылі, што захворвальнасць мае дынаміку, характэрную для шматгадовых назіранняў.
«Ва ўсіх рэгіёнах краіны адзначаецца штотыднёвы прырост захворванняў на вострыя рэспіраторныя інфекцыі, у тым ліку на COVID-19», — паведамілі ва ўстанове.
Медыкі ўсё гэтак жа чакаюць росту захворванняў на грып са студзеня да сакавіка 2024 года.
У Мінздароўя «з улікам сітуацыі» нагадалі пра вакцынацыю супраць грыпу і COVID-19, а таксама пра неабходнасць масак і сацыяльнай дыстанцыі ў грамадскіх месцах, дзе вялікая рызыка кантакту з хворым чалавекам — напрыклад, падчас наведвання арганізацый аховы здароўя.