Шматдзетны бацька вяртаўся ў Беларусь з Літвы на ровары і на мяжы на метр перасек зялёны калідор, каб спытаць у мытніка, як яму задэклараваць амаль 20 тысяч еўра. У дачыненні да мужчыны склалі пратакол, а пазней канфіскавалі палову сумы, паведамляецца ў пастанове, якая была апублікаваная ў банку судовых рашэнняў.
Адміністрацыйная справа разглядалася судом Кастрычніцкага раёна Гродна. Як гаворыцца ў пастанове, мужчына вёз з Літвы ў Беларусь 19,5 тысячы еўра, а таксама 355 беларускіх рублёў. То-бок агулам перамяшчаў амаль 21 тысячу даляраў у эквіваленце.
У судзе беларус растлумачыў, што выхоўвае пяцярых няпоўнагадовых дзяцей, адно з якіх мае інваліднасць. Грошы ён вёз для будаўніцтва дома. Ён таксама расказаў, што літоўска-беларускую мяжу перасякаў на ровары. Пасля праходжання пашпартнага кантролю ён падышоў да супрацоўніка мытні спытаць, як задэклараваць грошы. Праз гэта ён перасек зялёны калідор на адзін метр. Супрацоўнік мытні палічыў гэта парушэннем і склаў у дачыненні да беларуса пратакол за недэклараванне валюты.
Суд прызнаў мужчыну вінаватым. Яму прызначылі 185 рублёў штрафу, а таксама канфіскавалі 10,3 тысячы еўра. У пастанове паведамляецца, што сумы, большыя за 10 000 даляраў у эквіваленце, падчас увозу ў Беларусь падлягаюць пісьмоваму дэклараванню. Пры гэтым скрыжаванне лініі ўваходу (уезду) у зялёны калідор з’яўляецца «заявай фізічнай асобы пра адсутнасць тавараў, якія падлягаюць мытнаму дэклараванню».
Мужчына абскардзіў рашэнне суда, спаслаўшыся ў прыватнасці на тое, што не ведаў правілаў перасячэння мяжы і дэкларавання валюты. Аднак яго апеляцыю адхілілі. Гродзенскі абласны суд не паверыў яго аргументам, адзначыўшы, што парушальнік «неаднаразова перасякаў дзяржаўную мяжу Рэспублікі Беларусь».
Пастанову суда пакінулі ў сіле, а скаргу — без задавальнення.