У Мінскім абласным судзе вынеслі прысуд палітвязню, ваеннаму аналітыку Ягору Лебядку. Пра гэта паведамляе праваабарончы цэнтр «Вясна».
Яго прызналі вінаватым па абодвух пунктах артыкула 361−4 КК аб «садзейнічанні экстрэмісцкай дзейнасці», у тым ліку паўторна. Суддзя Алена Міснік асудзіла яго на пяць гадоў калоніі ва ўмовах узмоцненага рэжыму.
Згодна з матэрыяламі справы, у красавіку і траўні 2022 года Лебядок «з мэтай забяспечання дзейнасці грамадскага дэструктыўнага канала, інфармацыйная прадукцыя якога прызнаная судом экстрэмісцкім матэрыялам, даў інтэрв'ю прадстаўніку названага канала» на тэму расійскага ўварвання ва Украіну і ролі Беларусі ў гэтай вайне.
Пры гэтым «экстрэмісцкім фарміраваннем» названы рэсурс прызналі толькі ў ліпені.
Суд над Ягорам Лебядком пачаўся 14 снежня.
Нагадаем, Ягор Лебядок знаходзіцца за кратамі з 12 ліпеня 2022 года, калі быў затрыманы ў сябе дома ў Смалявічах. Пасля затрымання сілавікі апублікавалі яго «пакаяльнае» відэа, на якім мужчына ўсміхаўся. У канцы ліпеня Лебядок мусіў быў выйсці на волю пасля 15 сутак адміністрацыйнага арышту за «непадпарадкаванне», але гэтага не адбылося. Аналітыка абвінавацілі ў тым, што ён даваў інтэрв'ю выданням, унесеным у спіс экстрэмісцкіх матэрыялаў.
Да затрымання Ягор Лебядок неаднаразова выступаў у СМІ з каментарамі па абароннай тэматыцы, вёў тэлеграм-канал, у якім размяшчаў ваенную аналітыку. Лебядок — кандыдат фізіка-матэматычных навук. Раней быў загадчыкам лабараторыі ў ДНВА «Оптыка, оптаэлектроніка і лазерная тэхніка». У 2022 годзе яго звольнілі.
Пасля арышту Лебядка праваабаронцы прызналі яго палітвязнем, а Лукашэнка пазбавіў звання старшага лейтэнанта запасу.