Мінабароны 21 чэрвеня абвясціла раптоўную праверку гатоўнасці злучэнняў і вайсковых частак Узброеных сіл да выканання задач па прызначэнні.
Да праверкі прыцягнулі вайсковыя часткі і падраздзяленні аператыўных камандаванняў, сіл спецыяльных аперацый, ракетных войскаў і артылерыі, ВПС і войскаў СПА.
— Праверка мае комплексны характар і прадугледжвае задзейнічанне разнастайных сіл. У прыватнасці, падраздзяленні і вайсковыя часткі сіл спецыяльных аперацый атрымалі задачу высунуцца ў зноў прызначаныя раёны, арганізаваць іх інжынернае абсталяванне, стварэнне сістэмы загародаў. У будучыні быць у гатоўнасці дзейнічаць па пошуку, знішчэнні і блакаванні дыверсійна-разведвальных груп умоўнага праціўніка, нясенні службы на блокпастах, а таксама аператыўным рэагаванні і выхадзе на прызначаныя рубяжы, — паведаміў начальнік Генштаба Павел Муравейка.
Ён дадаў, што «падраздзяленні зенітна-ракетных войскаў ажыццяўляюць высоўванне ў новыя пазіцыйныя раёны і з іх заняццем завершаць стварэнне сістэмы зенітна-ракетнага прыкрыцця важных аб’ектаў на пагрозлівых напрамках».
— Адначасова з дзеяннямі сіл спецыяльных аперацый актыўна дзейнічаюць падраздзяленні ракетных войскаў і артылерыі, абсталяваныя комплексамі «Паланэз» і рэактыўнымі сістэмамі залпавага агню БМ-21 «Град», — дадаў Муравейка.
У праверцы будзе «комплексна» дзейнічаць авіяцыя, якая «выканае задачы па дастаўцы і высадцы штурмавых груп на пагрозлівыя напрамкі, падтрымцы сухапутнай групоўкі пры дзеяннях на зямлі, а таксама нясенні і забяспечанні знішчальнага авіяцыйнага прыкрыцця ў важных аб’ектах у рамках сістэмы супрацьпаветранай абароны».
— Актыўна будуць выкарыстоўвацца беспілотныя лётныя апараты, сілы і сродкі радыёэлектроннай барацьбы, а таксама плануецца адпрацаваць прыёмы дзеяння сухапутных груповак у лясіста-балоцістай мясцовасці, — расказаў начальнік Генштаба.
У мерапрыемствах задзейнічаныя палігоны і ўчасткі мясцовасці ў Брэсцкай і Гомельскай абласцях. У гэты перыяд магчымы рух баявой тэхнікі па дарогах агульнага карыстання.
Дзеянні Узброеных сіл Беларусі пракаментавалі ва Украіне. Прадстаўнік Дзяржаўнай памежнай службы краіны Андрэй Дземчанка ў эфіры тэлемарафона «Адзіныя навіны» паведаміў, што на сённяшні дзень у Беларусі «няма сіл для ўварвання на тэрыторыю Украіны». Аднак украінскія Сілы абароны Украіны «гатовыя да развіцця падзей», падкрэсліў спікер.
«Па мяжы з Беларуссю сітуацыя нязменная. У Расіі на тэрыторыі Беларусі няма сіл для ўварвання на тэрыторыю нашай краіны. Цяпер беларускія падраздзяленні, якія ў пэўнай ступені ўзмацняюць мяжу з нашай краінай, па-ранейшаму знаходзяцца на розных кірунках, але знаходзяцца на вызначанай адлегласці ад мяжы», — сказаў Андрэй Дземчанка.
Нагадаем, 20 чэрвеня Дзяржаўны памежны камітэт паведаміў, што на ўкраінскай тэрыторыі ля мяжы з нашай краінай «канцэнтруюцца розныя падраздзяленні, у тым ліку з цяжкім узбраеннем: МТ-ЛБ, БМП, у тым ліку амерыканскія Bradley, рэактыўныя сістэмы залпавага агню HIMARS, гаўбіцы М777, зенітныя самаходныя ўстаноўкі „Гепард“ нямецкай вытворчасці, а таксама іншыя сродкі паражэння», і папярэдзіў пра «недапушчальнасць правакацый».
Чытайце таксама
