Беларусы актыўна прадаюць з прычыны рэлакацыі свой бізнес у нашай краіне — прычым рознага маштабу і кірункаў. На анлайн-пляцоўках можна знайсці дзясяткі такіх абвестак. Расказваем пра некаторыя з іх (гэтыя абвесткі былі размешчаныя ў чэрвені і канцы траўня, то-бок досыць свежыя).
Цырульня і папулярная музычная школа ў Мінску
У Мінску ў сувязі з «планаваным і няпростым пераездам» прадаюць цырульню, размешчаную «ў адным з самых элітных раёнаў». Кошт — амаль 60 тысяч рублёў. Установа мае дзве залы — дзіцячую і дарослую.
Як паведамляецца, у раёне, дзе знаходзіцца салон, няма канкурэнтаў. «Загружанасць цырульні на гэты момант — 33,3%, і пры гэтым усё роўна прыносіць стабільны прыбытак», — кажа прадавец.
Уладальнік «знакамітай музычнай школы» ў Мінску ўжо з’ехаў «на ПМЖ у іншую краіну», таму цяпер ягоны бізнес выстаўлены на продаж. «Уваходзіць у топ 5 вакальных студый Мінска. Бізнес паспяхова працуе больш за 7 гадоў, за гэты час напрацаваная велізарная кліенцкая база на некалькі дзясяткаў тысяч чалавек», — гаворыцца ў абвестцы. Кошт — трохі больш за 86 тыс. рублёў.
Школа размешчаная ў двух суседніх памяшканнях. Як паведамляецца, класы абсталяваныя ўсім неабходным для заняткаў. У кошт уваходзяць сайт і сацсеткі.
У штаце — 20 супрацоўнікаў. У сезон школа мае больш за 300 вучняў.
Школа прыгажосці і крамы ў розных гарадах
«Пераязджаем у іншую краіну», — канстатуюць уладальнікі стокавай крамы брэндавага адзення ў сталіцы. Працуе гандлёвы аб’ект з 2023 года. Разам з бізнесам новым уласнікам перададуць старонкі ў сацсетках і абяцаюць падтрымку на пачатковым этапе.
«Продаж у сувязі з пераездам у іншую краіну», — гаворыцца ў іншай абвестцы. Гаворка пра школу прыгажосці, таксама размешчаную ў сталіцы. За гатовы бізнес просяць 30,5 тысячы рублёў.
Сярэдні прыбытак складае 3 тыс. Як сцвярджаецца, акупальнасць школы — 10 месяцаў. Таксама прадавец паведамляе, што адзін з плюсаў бізнесу — высокі чэк і немагчымасць сысці ў мінус.
З прычыны змены месца жыхарства ў апошнія дні траўня выставілі на продаж сетку брэндавых абутковых крамаў. Дзве з іх — у Мінску і адна — у Віцебску, ва ўсіх выпадках пункты знаходзяцца ў гандлёвых цэнтрах. Плюс ёсць склад, фарматны офіс. Кошт — 326,7 тыс. рублёў. У яго ўваходзяць даволі вялікі запас тавару і іншыя матэрыяльныя актывы.
Змена краіны стала прычынай, з якой у Гомелі хочуць знайсці новага ўладальніка інтэрнэт-крамы дзіцячых тавараў. Працуе яна з 2012 года. «Напрацаваная пастаянная кліенцкая база (каля 15 тысяч падпісчыкаў). Праграмістамі зробленая таргетаваная рэклама», — піша прадавец. Пра цану прапануюць дамаўляцца асабіста.
Беларускі брэнд адзення і кветкі з патэнтамі
З гэтай самай прычыны ў Мінску прадаюць айчынны брэнд адзення. Кошт — 9 тысяч даляраў (больш за 28 тысяч рублёў паводле курсу Нацбанка на 19 чэрвеня). Уладальнік адзначае, што разам з брэндам пакупнік атрымае гатовы бізнес, старонкі ў сацсетках, пункты для рэалізацыі вырабаў, склад з рэшткамі гатовага адзення, лякалы і расходныя матэрыялы, а таксама двор з месцам, дзе адшываюцца вырабы, і кантакты падрадчыкаў.
Яшчэ аднаму бізнесу — па продажы стабілізаваных кветак і падарункаў — шукаюць новых уладальнікаў не толькі ў сувязі са зменай краіны пражывання, але і з разводам. Кошт — больш за 105 тыс.
У абвестцы гаворыцца, што бізнес запатэнтаваны, продаж ідзе праз пляцоўку Wildberries. «Некаторыя катэгорыі тавару ўжо прадаюцца на маркетплэйсах на суму звыш 1 млн даляраў у год. І запатэнтаваныя намі як вынаходкі на тэрыторыі Расіі. Што дае манаполію на рынку і абарону ад канкурэнтаў», — сцвярджае прадавец.
У кошт уключаны патэнт на таварны знак, патэнты на вынаходствы, таварныя рэшткі.
Чытайце таксама
