Некалькі не звязаных паміж сабой крыніц, якія працуюць на БЕЛАЗе, паведамілі «Люстэрку», што затрыманы генеральны дырэктар прадпрыемства Сяргей Нікіфаровіч. Пазней нам стала вядома, што на заводзе актыўна абмяркоўваюць гэтую тэму, аднак ніякіх афіцыйных аб’яваў дагэтуль не было. Мы высветлілі, што кіраўніка на працоўным месцы няма, — і невядома, калі ён вернецца. Расказваем падрабязнасці.
Як расказалі крыніцы, Сяргей Нікіфаровіч быў затрыманы ўвечары 15 снежня. Нашыя суразмоўцы сцвярджаюць, што з таго часу топ-менеджар завода знаходзіцца ў СІЗА КДБ. Адна з магчымых прычын — карупцыя.
Пры гэтым афіцыйных паведамленняў пра затрыманне дырэктара БЕЛАЗа не было ні ад сілавікоў, ні ад Аляксандра Лукашэнкі, які любіць самастойна паведамляць пра такія рэзанансныя справы.
У панядзелак, 18 снежня, журналіст «Люстэрка» пад выглядам звычайнага беларуса патэлефанаваў у прыёмны пакой Нікіфаровіча. Там заявілі, што таго на працоўным месцы няма.
— Сяргей Алегавіч на нарадзе, — сказала сакратарка. Пасля ў той дзень, як і ў аўторак, слухаўку ў прыёмныі пакоі не падымалі.
У сераду, адказваючы на прамое пытанне, ці затрыманы Нікіфаровіч, сакратарка заявіла, што нічога пра гэта не ведае:
— На працоўным месцы Сяргея Алегавіча цяпер няма, але пра тое, што яго затрымалі, я нічога не ведаю. Дзякуй, што сказалі.
21 снежня мы зрабілі апошнюю на гэты момант спробу знайсці Нікіфаровіча: пад выглядам сакратаркі аднаго з расійскіх партнёраў прадпрыемства нашая журналістка патэлефанавала ў яго прыёмны пакой і паспрабавала прызначыць сустрэчу.
— Да Новага года дакладна не. Сяргей Алегавіч у адпачынку. Вось пасля і тэлефануйце, калі ласка, — сказала сакратарка генеральнага дырэктара, параіўшы звязацца пасля 8 студзеня, калі БЕЛАЗ выйдзе з вакацый.
З панядзелка да чацвярга мы таксама спрабавалі дазваніцца на мабільны тэлефон генеральнага дырэктара, аднак ён не адказаў.
Сяргей Нікіфаровіч нарадзіўся ў 1979 годзе ў Жодзіне. Працоўную кар’еру пачаў на БЕЛАЗе на пасадзе майстра ўчастка. З 2015 да 2017 года быў намеснікам старшыні Жодзінскага гарвыканкама, потым перайшоў на працу ў пінскае ААТ «Кузлітмаш», дзе спачатку працаваў намеснікам дырэктара, а пазней узначаліў прадпрыемства. 21 верасня 2020 года яго прызначалі генеральным дырэктарам ААТ «БЕЛАЗ — кіраўнічая кампанія холдынгу «БЕЛАЗ-Холдынг».
Чытайце таксама
