У выпадку крытычнага інцыдэнту ЕС цалкам закрые межы з Беларуссю, паведаміў кіраўнік МУС Польшчы Марыюш Каміньскі па выніках сустрэчы з калегамі з краін Балтыі, якая прайшла сёння ў Варшаве, піша RMF24.
«Калі на мяжы з Беларуссю адбудзецца крытычны інцыдэнт, незалежна ад таго, мяжа гэта Польшчы, Літвы ці Латвіі, мы прымем неадкладныя меры ў адказ. Усе памежныя пераходы будуць закрытыя», — сказаў Каміньскі.
Кіраўніца МУС Літвы Агнэ Білатайтэ ўдакладніла, што міністры дамовіліся і пра агульныя крытэры для прыняцця такога рашэння, і расказала пра іх.
«Іх два: па-першае, узброены інцыдэнт або інцыдэнты ля мяжы адной з краін. Ён мусіць быць такім, які ўяўляе сур’ёзную пагрозу нацбяспецы краін. Другі крытэр — арганізаваны масавы прарыў нелегалаў», — перадае словы Білатайтэ Delfi.
Паводле яе словаў, калі будзе зафіксаваны адзін з такіх інцыдэнтаў, то пройдзе аператыўны абмен інфармацыяй паміж службамі, і тады будзе прынятае рашэнне [пра закрыццё межаў] на ўзроўні ўрадаў.
Раней міністр унутраных справаў Літвы Агнэ Білатайтэ заявіла, што яе ведамства прапануе закрыць яшчэ два пункты пропуску на мяжы з Беларуссю. Гэта памежныя пункты «Лаварышкес» (з беларускага боку — «Катлоўка») і «Райгардас» («Прывалка»).