Нямецкае выданне Taz і французскае Disclose апублікавалі матэрыял пра тое, што IKEA нібыта працавала з беларускімі пастаўшчыкамі, якія выкарыстоўвалі працу зняволеных. «Люстэрка» пацікавілася ў шведскай кампаніі, ці адпавядае гэтая інфармацыя рэчаіснасці. У IKEA на наш запыт адказалі, што рэгулярна правяралі беларускіх пастаўшчыкоў на адпаведнасць этычным стандартам адной з найбуйнейшых у свеце сетак вытворчасці і продажу мэблі. Расказваем падрабязнасці.
Медыя: беларускія пастаўшчыкі IKEA выкарыстоўвалі працу зняволеных, у тым ліку палітычных
Журналісты нямецкай газеты Taz і французскага выдання Disclose апублікавалі матэрыял, у якім сцвярджаецца, што IKEA працавала з беларускімі пастаўшчыкамі, якія выкарыстоўвалі працу зняволеных.
«Каля паловы буйных беларускіх пастаўшчыкоў Ikea за апошнія дзесяць гадоў мелі сувязі з папраўчымі калоніямі», — гаворыцца ў матэрыяле. У тэксце сярод іншага ёсць інфармацыя, што падчас вытворчасці такіх тавараў магла выкарыстоўвацца ў тым ліку праца палітвязняў.
У прыватнасці, паводле заявы аўтараў расследавання, гэта датычыць вытворчасці кніжных шафаў Baggebo, камодаў Kullen і ложкаў Brimnes. Сярод беларускіх пастаўшчыкоў IKEA, якія супрацоўнічалі з папраўчымі калоніямі, названыя магілёўскае тэкстыльнае дзяржпрадпрыемства «Магатэкс», холдынг Borwood і дзяржаўнае мэблевае прадпрыемства «Івацэвічдрэў». Першая кампанія, паводле паведамлення медыя, працавала як мінімум з чатырма папраўчымі калоніямі. «Віцебскдрэў», што ўваходзіць у холдынг Borwood, працаваў па кантракце з ПК-2, а «Івацэвічдрэў» — з ПК-5.
IKEA: Мы праводзілі рэгулярныя праверкі
У IKEA на наш запыт адказалі, што вельмі сур’ёзна ставяцца да паведамленняў пра Беларусь і ніколі не дапускаюць парушэнняў правоў чалавека ў ланцужку паставак. «На ўсіх рынках, дзе мы прысутнічаем, мы дакладна заяўляем, што ў нашым бізнесе няма месца парушэнням правоў чалавека», — паведамілі ў прэс-службе кампаніі.
— Выкарыстоўваючы наш доўгатэрміновы падыход, мы імкнёмся да ўстойлівых зменаў да лепшага, дзе б мы ні знаходзіліся. Мы сур’ёзна ставімся да сваёй адказнасці за ўкараненне працэсаў выяўлення і мінімізацыі рызык з дапамогай надзейных працэдур належнай абачлівасці, уключаючы праверку іншымі аўдытарамі, — гаворыцца ў каментары.
Прэс-сакратар IKEA паведаміў, што ў чэрвені 2021 года кампанія прыняла рашэнне спыніць развіццё любога новага бізнесу з прычыны праблем з правамі чалавека ў Беларусі і непрадказальнай абстаноўкі.
— У той жа час мы працягвалі вывучаць наступны крок, каб пакінуць краіну, не рызыкуючы сродкамі для існавання тысяч людзей, якіх мы наўпрост ці ўскосна нанялі. Вайна ва Украіне і міжнародныя санкцыі паскорылі гэтыя планы. У чэрвені 2022 года IKEA прыняла рашэнне пакінуць краіну і скасаваць кантракты з нашымі пастаўшчыкамі, — паведамілі ў кампаніі. — Прысутнічаючы ў Беларусі, мы праводзілі рэгулярныя праверкі ў спалучэнні з карэктаваннем нашага ланцужка паставак, каб забяспечыць адпаведнасць нашым патрабаванням. Кожны раз, калі мы атрымліваем прыкметы неправамерных паводзін, мы сур’ёзна ставімся да іх, расследуем іх і прымаем меры. Мы заўсёды імкнёмся адпавядаць нашым каштоўнасцям і чаканням удзельнікаў нашага ланцужка паставак.