Найлепшыя каханкі — тыя, хто дае волю сваім пачуццям. Экспертка сцвярджае, што дзеля добрага сэксу і якасных адносін варта прыгледзецца да мужчын, якім не сорамна расплакацца, калі ім гэтага хочацца, піша The Sun.
Паводле Марыны Лазарыс, аўтаркі кнігі «Мужчынам таксама патрэбнае каханне» і коўча ў сферы адносін, найлепшымі каханкамі робяцца мужчыны, якія не стрымліваюць слёз.
— Знайсці тонкую грань паміж уразлівасцю і мужнасцю — самая вялікая праблема для мужчын у сучасным грамадстве, — лічыць Лазарыс.
Экспертка тлумачыць такую пазіцыю тым, што калі жанчына знойдзе мужчыну, які разумее і пражывае свае эмоцыі, то яна знойдзе не проста добрага партнёра на адну ноч, а «набытак усяго жыцця».
Лазарыс кажа, што частка маладога пакалення — гаворка пра «зумераў» — пачынае гэта разумець. Адным з сігналаў гэтага яна назвала тое, што яго прадстаўніцы ўсё часцей выбіраюць «добрых хлопцаў», якія разумеюць жанчын і іх пачуцці. Раней жа ўвагу больш звярталі на «кепскіх».
— Думаю, што вызначэнне таго, што лічыцца мужным, змяняецца, — пацвердзіў Адам Коэн-Аслатэй, уладальнік службы знаёмстваў у ЗША. — Некаторыя традыцыйныя нормы трансфармуюцца. Мужнасць сёння не ў тым, каб быць крутым хлопцам, а ў тым, каб быць сумленным, поўным павагі, тым, хто аберагае і эмацыйна выяўляе сябе.
Адзначым, што ў той жа час прадстаўнікі пакалення Z (прынамсі, з Вялікабрытаніі) часцей, чым іх аднагодкі і прадстаўнікі «бэбі-бумераў», ставяцца да фемінізму негатыўна і лічаць, што ён прыносіць больш шкоды, чым карысці. А яшчэ яны бачаць куміра ў Эндру Тэйце — экс-кікбаксёру і блогеру, якога абвінавачваюць у згвалтаванні, кантрабандзе людзей і стварэнні злачыннай арганізаванай групоўкі з мэтай сэксуалізаванай эксплуатацыі жанчын.
Так што, імаверна, тыя, хто ўсё ж зробіць стаўку на эмацыйнасць і мяккасць, сапраўды змогуць быць больш прывабнымі ў вачах сваіх аднагодак, чым «крутыя хлопцы».
Чытайце таксама
