Жыхар Наваполацка, які скокнуў з балкона трэцяга паверха пасля таго, як да яго на вечарынку прыйшла міліцыя, знаходзіцца ў бальніцы. Яго здароўю нічога не пагражае, паведамілі ў МУС.
Інцыдэнт здарыўся 15 чэрвеня ў Наваполацку. У міліцыю паступіў званок ад жыхароў шматкватэрнага дома, якія расказалі, што на трэцім паверсе «шуміць кампанія маладых людзей».
Выехаўшы на адрас, супрацоўнікі міліцыі пачулі гучную музыку, а на просьбу адчыніць дзверы ніхто не адрэагаваў. Тады на месца выклікалі ратавальнікаў, каб тыя дапамаглі адчыніць дзверы.
«Як толькі моладзь пачула гук электрапілы, пусцілі міліцыянераў у жыллё», — паведамілі ў МУС.
У кватэры знаходзіліся шэсць чалавек ва ўзросце ад 18 да 19 гадоў, сярод іх была і 16-гадовая дзяўчына. Яна сказала бацькам, што будзе начаваць у сяброўкі, а сама бавіла час у грамадстве старэйшых сяброў.
«Кампанія распівала спіртныя напоі. 19-гадовы жыхар Наваполацка, захацеўшы пазбегнуць сустрэчы з супрацоўнікамі міліцыі, выскачыў з балкона. З цялеснымі пашкоджаннямі малады чалавек дастаўлены ў бальніцу, яго жыццю і здароўю нічога не пагражае», — падкрэслілі ў МУС.
Раней пра інцыдэнт паведамілі ў пабліку «Первый Новополоцк | Полоцк» «ВКонтакте». Там сцвярджалася, што ў кватэры адпачывала група падлеткаў і тыя нібыта збілі свайго таварыша да «несвядомага стану». Пра гэта ў прэс-рэлізе МУС не згадваецца.