Іспанскія СМІ паведамілі пра тое, што ў краіне забіты расійскі лётчык Максім Кузьмінаў, які ў жніўні 2023 года сагнаў верталёт Мі-8 і паспяхова прызямліў яго на тэрыторыі Украіны. У Галоўным упраўленні разведкі Украіны гэтую інфармацыю пацвердзілі.
Як напісала іспанскае СМІ Il Correspondente, Максім Кузьмінаў быў забіты ў горадзе Вільяхаёса ў аўторак, 13 лютага. Паліцыя налічыла на целе не менш за 12 кулявых адтулін, таксама пры забітым знайшлі 100 000 еўра.
Выданне спаслалася на паведамленні мясцовых СМІ, якія пісалі пра здарэнне, не называючы імені забітага, і толькі адзначалі, што гэта быў украінец. І згадала, што інфармацыю пра асобу ахвяры яны атрымалі ад прадстаўніка грамадзянскай гвардыі Іспаніі, які расследуе гэтую справу і захацеў застацца ананімным.
Іншых пацверджанняў гэтай інфармацыі не прагучала.
Фэйк ці праўда?
Прарасійскі ваенны тэлеграм-канал Fighterbomber не выключыў, што гэтае паведамленне можа быць фэйкам ці аперацыяй па прыкрыцці: «Гэта ўжо трэцяе забойства Кузьмінава за апошні час».
Акрамя таго, многія звярнулі ўвагу, што інфармацыю пра смерць Кузьмінава ўпершыню апублікаваў праект Eureka News, які мае толькі акаўнт у Twitter і Telegram-канал, пасля чаго яе актыўна падхапілі расійскія прапагандысцкія СМІ.
Выклікала пытанні і разыходжанне ва ўзросце: у публікацыі іспанскіх СМІ гаворыцца, што забітаму было 33 гады, а Кузьмінаву — 28.
Разведка пацвердзіла
Між тым прадстаўнік ГУР Андрэй Юсаў у каментары «Суспільнаму» інфармацыю пацвердзіў.
«Можам пацвердзіць факт смерці», — заявіў Юсаў, не ўдакладняючы прычын смерці пілота.
«Ён жа вырашыў пераехаць у Іспанію замест таго, каб быць тут. З таго, што ведаем: запрасіў сваю былую да сябе, і знайшлі застрэленым», — прыводзіць «Украінская праўда» словы свайго неназванага суразмоўцы ва ўкраінскай разведцы, які таксама паведаміў, што непадалёк знайшлі згарэлую машыну, на якой меркавана збягалі ліквідатары.
Нагадаем, 23 жніўня ў СМІ з’явілася інфармацыя, што расійскі Мі-8 прызямліўся на ўкраінскай вайсковай базе. Ва ўкраінскай разведцы заявілі, што гэта была спецаперацыя — расійскі пілот добраахвотна перагнаў верталёт, перад гэтым ягоную сям’ю таемна вывезлі з Расіі.
Пазней лётчык Максім Кузьмінаў расказаў, што прыняў такое рашэнне, каб не спрыяць злачынствам, якія Расія чыніць ва Украіне. За перагон верталёта ён атрымаў 500 тысяч даляраў.
