Настаўнік музыкі адной са школ Мінскай вобласці абвінавачваецца ў шматлікіх фактах сэксуальнага гвалту ў дачыненні да дзяцей. Пра падрабязнасці крымінальнай справы расказалі ў Следчым камітэце.
Паводле версіі следства, мужчына 15 гадоў здзяйсняў гвалтоўныя дзеянні сэксуальнага характару ў дачыненні да школьнікаў ва ўзросце ад 6 да 14 гадоў. Падчас правядзення дадатковых заняткаў па вакале пасля ўрокаў пад выглядам фотасесій, жартаў, казытання, адцягнення і пераключэння ўвагі здзяйсняў непрыстойныя дзеянні.
Усё, што адбываецца, фігурант запісваў на фота-відэаапаратуру. Падчас следства ў мужчыны знайшлі больш за 1500 выяваў і відэазапісаў, частка з якіх прызнаная парнаграфічнымі матэрыяламі.
Следчыя ўстанавілі 49 эпізодаў злачыннай дзейнасці фігуранта. Ахвярамі гвалту з боку настаўніка сталі школьніцы, якія з прычыны свайго ўзросту і індывідуальна-псіхалагічных асаблівасцяў не разумелі характару супрацьпраўных дзеянняў настаўніка.
Праведзенай падчас папярэдняга расследавання стацыянарнай комплекснай судовай псіхалагічна-сэксалагічна-псіхафізіялагічна-псіхіятрычнай экспертызай устаноўлена, што настаўнік пакутаваў на разлад сэксуальных схільнасцяў у форме педафіліі.
«Дзеці, якія падвяргаліся „асаблівай увазе“ настаўніка, расказвалі кіраўніцтву, педагагічным работнікам школы і бацькам пра своеасаблівыя паводзіны педагога, аднак службовыя асобы не надалі значэння гэтай інфармацыі, што дазволіла мужчыну працягваць свае злачынныя дзеянні доўгі час», — паведамілі ў Следчым камітэце.
Дырэктар школы, яго намеснік і педагог-псіхолаг адхіленыя ад займаных пасадаў. Іх дзеянням, а таксама дзеянням іншых супрацоўнікаў установы адукацыі будзе дадзеная дадатковая прававая ацэнка.
Былому 51-гадоваму настаўніку музыкі выставілі абвінавачанне па шэрагу артыкулаў КК:
- ч. 3 арт. 167 (Здзяйсненне іншых гвалтоўных дзеянняў сэксуальнага характару ў дачыненні да заведама малагадовых);
- ч. 1 і ч. 2 арт. 169 (Здзяйсненне распусных дзеянняў педагагічным работнікам, у дачыненні да заведама малагадовых);
- ч. 3 ст. 343−1 (Выкарыстанне заведама малагадовых для вырабу парнаграфічных матэрыялаў з іх выявамі).
З санкцыі пракурора да абвінавачанага ўжылі меру стрымання ў выглядзе заключэння пад варту.