У выніку ўспышкі газапаветранай сумесі на Светлагорскім цэлюлозна-кардонным камбінаце загінулі як найменш тры чалавекі. Пра гэта газеце «Светлагорскiя навiны» расказаў начальнік РАНС Андрэй Высоцкі.
«Падчас пошукава-выратавальнай працы на месцы аварыі знойдзеныя рэшткі меркавана трох чалавек. Разбор завалаў і пошукавыя работы працягваюцца», — сказаў прадстаўнік МНС.
Раней у Міністэрстве аховы здароўя расказалі, што ў выніку надзвычайнага здарэння пацярпелі чатыры чалавекі.
«Паводле папярэдняй інфармацыі Цэнтра медыцынскага рэагавання Міністэрства аховы здароўя, пацярпелых чацвёра (1985−1996 гадоў нараджэння). Ва ўсіх дыягнаставаныя паверхневыя раны галавы і паверхневыя апёкі рук. Медыцынская дапамога ім аказаная брыгадамі хуткай медыцынскай дапамогі на месцы. Ад шпіталізацыі пацярпелыя адмовіліся», — гаварылася ў паведамленні.
Следчы камітэт распачаў крымінальную справу па артыкуле 302 КК (Парушэнне правілаў вытворча-тэхнічнай дысцыпліны, правілаў бяспекі на выбухованебяспечных прадпрыемствах або ў выбухованебяспечных цэхах альбо правілаў бяспекі выбухованебяспечных работ).
Нагадаем, што днём 7 чэрвеня на Светлагорскім цэлюлозна-кардонным камбінаце адбылася ўспышка газапаветранай сумесі. Паведамленне пра надзвычайнае здарэнне паступіла ратавальнікам каля 15.34. Далейшага гарэння не адбылося. Цяпер работнікі МНС астуджаюць канструкцыі, праводзяць работы па разборы разбураных элементаў.
Раней мясцовыя ўлады расказалі, што выбух адбыўся падчас правядзення прафілактычных і рамонтных работ у цэху выпаркі шкіпінару пры прамыванні цеплаабменніка. Пагрозы жыццю і здароўю насельніцтва няма.