Днём у чацвер, 29 снежня, тэлеграм-канал «Беларускі Гаюн» са спасылкай на мясцовыя паблікі паведаміў, што ў полі ля вёскі Гарбаха ў Іванаўскім раёне Брэсцкай вобласці знайшлі ракету. Інфармацыя пра гэта з’явілася таксама ў неафіцыйным тэлеграм-канале, звязаным з беларускімі памежнікамі. Там сцвярджалася, што гэта ўкраінская ракета. Незабаве гэтую версію агучыла і прэс-служба Лукашэнкі.
— Сёння ў прамежку з 10.00 да 11.00 з тэрыторыі Украіны на тэрыторыю Беларусі зафіксаванае падзенне ўкраінскай ракеты комплексу С-300, — гаворыцца ў паведамленні тэлеграм-канала «Пул Первого». — Прэзідэнт быў неадкладна праінфармаваны пра падзенне ўкраінскай ракеты на тэрыторыі Беларусі.
— На яго даручэнне на месцы працуе група вайскоўцаў і следчых. Прычыны падзення цяпер высвятляюцца. Разглядаюцца дзве асноўныя версіі. Першая — залёт ракеты на тэрыторыю Беларусі, аналагічны нядаўняму інцыдэнту ў Польшчы, калі ракета паляцела не ў той бок. Другая — ракета збітая ў выніку працы сістэм СПА Беларусі, — заключылі ў прэс-службе.
На месцы здарэння працуюць спецыялісты СК, МУС і Міністэрства абароны. Звестак пра пацярпелых на дадзены момант няма.
Нагадаем, 7 красавіка ў Беларусі ўжо падала ракета. Тады ўсё сведчыла пра тое, што гэта быў расійскі боепрыпас.
Між тым, 15 лістапада ў Польшчы ў выніку выбуху ў вёсцы Пшэводаў пад Люблінам, размешчаным на мяжы з Украінай, загінулі два чалавекі, а таксама быў знішчаны трактар. Украінскія ўлады сцвярджалі, што ракета расійская, а расійскія вінавацілі Украіну. Прэзідэнт Польшчы Анджэй Дуда днём 16 лістапада заявіў, што падзенне ракеты — няшчасны выпадак.
«Паводле наяўнай інфармацыі, гэта была старая ракета С-300, вырабленая яшчэ ў СССР. І няма ўказанняў на тое, што яна была выпушчаная расійскім бокам. Мяркуючы з усяго, яна была выпушчаная ўкраінскай СПА і, на жаль, няўдала ўпала на нашую тэрыторыю», — сказаў Дуда.
