У Беларускім Чырвоным Крыжы зрабілі выбар: яны страцяць фінансаванне, але не генеральнага сакратара

Генеральны сакратар Беларускага таварыства Чырвонага Крыжа (БТЧК) Дзмітрый Шаўцоў працягвае выконваць свае паўнамоцтвы. Пра гэта ТАСС паведамілі ў арганізацыі. Раней БТЧК прапанавалі выбар — страціць генеральнага сакратара або фінансаванне.

«У адпаведнасці са статутам Беларускага Чырвонага Крыжа, да выключнай кампетэнцыі З’езду адносяцца пытанні абрання, пераабрання, адхілення генеральнага сакратара. 7 верасня XXVI З’ездам Беларускага Чырвонага Крыжа прынятае аднагалоснае рашэнне пра працяг працы Дзмітрыя Шаўцова на займанай ім пасадзе генеральнага сакратара. Такім чынам, Дзмітрый Шаўцоў працягвае выконваць свае паўнамоцтвы ў адпаведнасці з рашэннем З’езда», — паведамілі ў арганізацыі.

Нагадаем, 4 кастрычніка праўленне Міжнароднай федэрацыі таварыстваў Чырвонага Крыжа і Чырвонага Паўмесяца (МФЧК) пасля праведзенага расследавання заявіла, што генеральны сакратар Беларускага таварыства Чырвонага Крыжа (БТЧК) Дзмітрый Шаўцоў парушыў асноўныя прынцыпы руху, правілы выкарыстання яго эмблем і палітыку добрасумленнасці федэрацыі.

У МФЧК ва ўльтыматыўнай форме запатрабавалі адстаўкі генеральнага сакратара БЧК Шаўцова да 30 лістапада ў сувязі з парушэннем нейтралітэту праз ягоныя паездкі на Данбас. У іншым выпадку ў МФЧК прыгразілі прыпыніць сяброўства БЧК у федэрацыі і спыніць фінансаванне, калі гэтае патрабаванне не выканаюць да 30 лістапада.

Як разгортваўся скандал вакол Шаўцова

У ліпені генеральны сакратар БТЧК Дзмітрый Шаўцоў наведаў Данбас і трапіў на камеру ў форме з нашыўкай Z — расійскай ваеннай сімволікай. Між тым статут Чырвонага Крыжа забараняе аддаваць перавагу якому-небудзь боку ў ваенных дзеяннях.

У другі свой візіт на Данбас Шаўцоў (ужо ў майцы і кепцы з лагатыпамі Чырвонага Крыжа) раздаваў гуманітарную дапамогу і пацвердзіў на камеру прапагандысткі «Беларусь 1», што Беларускі Чырвоны Крыж бярэ «актыўны ўдзел» у вывазе ўкраінскіх дзяцей у нашую краіну — нібыта на аздараўленне.

Гэтай справай зацікавілася Міжнародная федэрацыя таварыстваў Чырвонага Крыжа і Чырвонага Паўмесяца (МФЧК). Там асудзілі паездку Шаўцова ў акупаваныя ўкраінскія рэгіёны. У арганізацыі палічылі, што абставіны візіту кампраметуюць яе асноўныя прынцыпы. Федэрацыя звязалася з Беларускім Чырвоным Крыжам, каб выказаць «сур'ёзную заклапочанасць і выключыць любую падобную дзейнасць у будучыні», а таксама звярнулася ў камітэт па выкананні прававых нормаў і пасярэдніцтве МФЧК і ЧП для расследавання гэтага выпадку.

У МФЧК таксама рэкамендавалі Дзмітрыю Шаўцову адысці ад справаў і папрасілі зрабіць гэта да 3 кастрычніка. Але ў пачатку верасня ў Мінску адбылося пазачарговае паседжанне XXVI з’езду Беларускага Чырвонага Крыжа, на якім Шаўцоў быў аднагалосна пераабраны на пасаду генеральнага сакратара, нягледзячы на рэкамендацыі МФЧК.